हनुमान नाही हनु-MAN

।। श्री ।। 

#9

सप्रेम नमस्कार विनंती विशेष, 

            चला तर मग आज आपण एका नवीन विषयावर बोलणार आहोत. बोलणार म्हणजे मी लिहिणार आणि तुम्ही वाचणार आहात. काय टेकनॉलॉजि मस्त झाली आहे ना. मी वेळ मिळेल तेंव्हा लिहितो, तुम्ही वेळ मिळेल तेंव्हा वाचतात आणि तरी आपलं बोलणं होतं. खरंच नीट वापर जमला पाहिजे टेकनॉलॉजिचा. 

        आता मागच्या ५ आठवड्यात मी तुम्हाला "द सिक्रेट्स ऑफ द मिलेनियर माईंड" हे पुस्तक माझ्या सोप्या शब्दात समजावून सांगितलं. आता आज काय लिहणार? एक सांगू का, आठवड्यातल्या एका दिवशी लेख लिहिण्यासाठी "कुठल्या विषयावर  लिहावं" हा विचार पूर्ण आठवडाभर डोक्यात फिरत असतो. 

        हे जे लेखक असतात ना सिरिअल्स किंवा चित्रपट लिहिणारे कसे काय काय विचार करत असतील ना. खरंच कमाल आहे डोक्याची. लिहिण्यावरून सांगतो मला ना शिव महिम्न मधला एक श्लोक फारच आवडतो. इथे खाली लिहिला आहे बघा. 

असित-गिरि-समं स्यात् कज्जलं सिन्धु-पात्रे।

सुर-तरुवर-शाखा लेखनी पत्रमुर्वी।।

लिखति यदि गृहीत्वा शारदा सर्वकालं।

तदपि तव गुणानामीश पारं न याति।। ३२।।

वरती लिहिलेल्या संस्कृत श्लोकाचा अर्थ - समुद्राच्या पाण्यात काळ्या पर्वतासारखे काजळ घालून त्याची शाई केली, कल्पवृक्षाच्या फांदीची लेखणी केली आणि लिहिण्यासाठी पान म्हणून पृथ्वी घेतली आणि लिहिण्यासाठी विद्येची देवता प्रत्यक्ष सरस्वती सतत लिहीत बसली तरी हे ईश्वरा तुझ्या गुणांचा पार लागणार नाही म्हणजेज शेवट होणार नाही. एवढे गुण तुझ्यात आहे.

            काय कमाल लिहिलं आहे ना? इतकी विचार शक्ती प्रत्येक लेखकाच्या लिखाणात यावी म्हणून हे सांगतो आहे. सागराच्या पाण्याकडून शाई तुम्हाला मिळावी, कल्पवृक्षाच्या फांदीचा पेन मिळावा आणि पृथ्वी कागद म्हणून समोर यावी आणि संपणार नाही इतके छान विचार तुमच्या म्हणजे लिहिणाऱ्याच्या मनात यावेत आणि वाचकांमध्ये सकारात्मक बदल घडावा. हे मला तो श्लोक वाचून वाटतं. 

        पण मी आज का बरं एकदम चित्रपट आणि शिव महिम्न, अध्यात्म, देवांमध्ये असलेली शक्ती हे असे विषय कुठून काढले आहेत? सांगतो. मी काही दिवसांपूर्वी हनु-मॅन नावाचा चित्रपट पहिला. म्हणलं ह्या विषयावर तर माझा ब्लॉग आलाच पाहिजे. आधीच मी सगळ्या सुपर हिरोंचा लहानपणीपासून फॅन त्यात जर कोणी हनुमान म्हणजे साक्षात बुद्धिमत्ताम वरिष्ठम ह्यांच्या शक्तींवर एक चित्रपट बनवणार असेल तर प्रेक्षक म्हणून मी आधी हजर पाहिजे.

         मी कोणासोबत पहिला माहिती का हा मुव्ही? माझ्या ८ आणि १० वर्षाच्या भाच्या-भाच्ची सोबत. आम्ही खूप एन्जॉय केला. तुम्हाला या ब्लॉग च्या शेवटी सांगतो का बरं मुलांनी हा चित्रपट पहिलाच पाहिजे असं मला वाटलं ते.

माझे दोन्ही भाच्चे असेच बघतं बसले होते!!!

       तर हनु-मॅन हा प्रशांत वर्मा नावाच्या व्यक्तीने लिहिलेला आणि दिग्दर्शित केलेला एक टिपिकल सुपर हिरोचा चित्रपट आहे. सुपर हिरोचा टिपिकल मी का म्हणालो कारण सगळ्या सुपर हिरो चित्रपटात एक गोष्ट सारखी असते. एक मुलगा असतो. मग त्यांना एक दिवस कुठून तरी दैवी शक्ती प्राप्त होते ज्या मुळे ते उडू शकतात, किंवा उड्या मारू शकतात, तो छोटा होऊ शकतो, मोठा होऊ शकतो, फास्ट पळू शकतो वगरे वगरे अशी काही तरी शक्ती मिळते. 

        हे सगळे हिरो त्यांच्या शक्तीचा आनंद घेतात पण नाण्याच्या दोन बाजू असतात ज्या मध्ये त्यांना ह्या शक्तीने होणारे दुष्परिणाम दिसू लागतात. मग एक वक्ती सुपर हिरोला ही शक्ती शाप नाही तर वरदान आहे हे समजावून सांगते आणि मग ह्या चित्रपटाच्या शेवटी ते आपण सुपर हिरो आहोत हे मान्य करून आयुष्य जगतात. 

भारतीय सुपरहिरोचा ड्रेस बघा कुंकू आणि हळद. सगळीकडे क्रीएटिव्हिटी!

        अश्याच प्रकारे जवळपास सगळे सुपरहिरोचे चित्रपट असतात. मग तुम्ही म्हणालं सगळे जर सारखेच असतात तर का सगळे बघायचे? तीच तर खरी मजा आहे. त्या प्रत्येकाच्या पॉवर्स, त्यांचा वापर करून केलेल्या सगळ्या फाइट्स, त्या पॉवर्स मुळे येणारे प्रॉब्लेम्स, त्या प्रॉब्लेम वर काढलेलं सोल्युशन आणि त्या मधून मिळणारी शिकवण हे सगळं वेगळं आहे. ते बघण्यातच खरी मजा असते.

हनु-मॅन

        तर ह्या चित्रपटात एका मुलाला म्हणजे हनुमंतला जी पॉवर मिळते ती साक्षात हनुमानांची. ती कशी? तर ह्या कथेमध्ये लेखक सांगतात की जेव्हा हनुमानांना इंद्राने फेकलेलं वज्र लागले तेव्हा एक रक्ताचा थेंब हा समुद्रात एका शिंपल्यात पडला. त्या शिंपल्यामधून एक मोती बाहेर आला आणि तो मोती ज्याला मिळाला त्याला ही शक्ती मिळते. तो मोती योग्य व्यक्ती पर्यंत पोहचतो पण व्हिलन मग तो मोती, ती शक्ती मिळवण्याचा प्रयत्न करतो आणि मग बरंच काय काय होत.

तेलगू चित्रपट निर्मात्यांची कल्पक विचार शक्ती: 

सुपरहिरो एन्ट्रीचा एक पण चान्स सोडला नाहीये. 

        माझ्या मते भारताचा सुपर हिरो नसतो आपण सगळे भारतीय सुपर हिरोच आहोत. आपण खूप सारे सुपर हिरो पहिले आहेत जे पूर्ण पणे भारतात बनलेले आहेत. शक्तिमान, क्रिश असे काही. पण आपल्या पुराणांमध्ये डोकावून बघितलं तर तुम्हाला सुपर पॉवर आणि सुपर हिरो इतकंच दिसेल. काय एक एक विद्या होत्या ना आपल्या पूर्वजांकडे. मंत्रविद्या, शस्त्रविद्या, लिखाण, काव्य, स्तोत्र हे कुठल्या सुपर पॉवर शिवाय कमी नाहीत.

        तर पुराणातल्या त्याचं सगळ्या गोष्टींचा आधार घेऊन चित्रपटाची गोष्ट पुढे सरकवली आहे म्हणून बघण्यात रस जास्त निर्माण होतो. हनुमानाला इंद्राने फेकलेले वज्र लागले ही कथा आपल्या सगळ्यांना माहिती आहे. पण तिथून पुढे खऱ्या कल्पना सुरु होतात. ते वज्र लागून एक रक्ताचा थेंब पृथ्वीवर पडला त्याची एक पॉवर आहे. ही सगळी घडवलेली कथा आहे. किती काय काय होऊ शकतं बघा ना कल्पना शक्ती वापरून.

ह्या चित्रपटातली हनुमान चालीसा एकदा ऐकाच. परत परत ऐकावी वाटते. मी इथे लिंक देतो आहे. एकदा ऐका. कारण एकदा ऐकली की परत परत तुम्हीच ऐकत रहाल.

        

            अजून एका सीन मध्ये जो हनुमंत दाखवला आहे सुपरहिरो तो काही जणांसोबत फाईट करत असतो आणि ही फाईट चालू असताना काही आज्जी आणि काकू मिळून आंब्याचं लोणचं बनवतं असतात. एकी कडे मारामारी करत करत तो त्यांना लोणचं बनवण्यात मदत करतो. शाब्बास से पठ्या....ह्याला म्हणतात भारतीय सुपरहिरो. बॅटमॅन असं करू पण शकणार नाही. अरे बॅटमॅन काय मदत करणार लोणचं बनवण्यात तो दिवसा समोर येत पण नाही. असो..दुसऱ्या सुपर हिरोंचा विषय नको. हे पण एक छान गाणं आहे त्याची पण लिंक मी इथे देतो आहे. नक्की ऐका. सुनिधी चौहानने मस्त म्हणलं आहे. 

        कसे हे साऊथ इंडियन चित्रपट निर्माते आपली कल्पना शक्ती वापरतात ना ते मला तरी बघायला आवडतं. तुम्हाला पण अशीच आवड असेल तर हा चित्रपट सोडला नाही पाहिजे.

लहान मुलांनी हा चित्रपट बघावा असं मला का वाटलं?

        आता मी तुम्हाला सांगतो का बरं सगळ्या लहान मुलांनी हा चित्रपट बघावा. काही आठवड्यांपूर्वी घडलेली एक सत्य घटना सांगतो. एक अठरा वर्षाचा मुलगा त्याचं नाव आहे आदित्य हा यू के वरून स्पेनला त्याच्या आई वडिलांसोबत निघाला होता. जेंव्हा हे सगळे विमानामध्ये बसले आदित्य स्नॅपचॅट वर आपल्या मित्रांसोबत गप्पा मारत होता. स्नॅपचॅट हा एक सोशल मीडिया प्लॅटफॉर्म आहे. गप्पांमध्ये काही ठरावीक मित्रांच्या ग्रुप मध्ये त्यानी मज्जा म्हणून मेसेज वर सांगितलं की "On my way to blow up the plane. I am a member of the Taliban." 

इतकं बारकाईनं चेक करणारं आहात का? एक काम करू का? मीच झोपतो ना स्कॅनर मध्ये.

        ह्या मेसेज मुळे स्नॅपचॅट वाले हादरले. त्यांनी हा मेसेज यु के आणि स्पॅनिश आर्मी दोघांपर्यंत पोचवला. विमान स्पेनला उतरलं आणि आदित्यला आर्मीने आपल्या ताब्यात घेतलं. इतकंच नाही संपूर्ण प्रवास यू के पासून स्पेन पर्यंत स्पॅनिश एरफोर्सचं एक विमान त्यांचा पाठलाग करत होतं. दोन दिवस आपल्या ताब्यात ठेवल्या नंतर आदित्यला बेलवर सोडण्यात आलं. त्याने कोर्टात पण हेच सत्य सांगितलं की हा मेसेज हा एक जोक म्हणून आमच्या मित्रा मित्रांमध्ये पाठवण्यात आला होता. 

        बरं ह्या सगळ्या प्रकारात आदित्यचं वय काय असेल? १८ वर्ष! फक्त १८ वर्ष. ठीक आहे. आणि कदाचित त्यांच्या कुटुंबाला ह्या जोक मुळे सगळ्यांना झालेल्या त्रासाचे जवळपास ९५,००० युरो मोजावे लागणार आहेत. ही सत्य घटना तुम्ही इंटरनेट वर सगळीकडे वाचू शकतात. 

        माझा प्रश्न हा आहे का बरं एका १८ वर्षाच्या मुलाला तालिबान किंवा ऑन माय वे टू ब्लो अप द प्लेन हे असे जोक करावे वाटले? कुठून ह्या गोष्टींचं ज्ञान आलं? न्यूज आणि चित्रपट अजून कुठून? दिवस रात्र जर कोणी लहान मुलगा आणि त्याच्या सोबत रहाणारे टीव्ही आणि पेपरच्या माध्यमातून न्यूज वर होणारे रेप, हिंसा, मारामारी, खून, चोऱ्या, फसवणूक ह्या बद्दलच बघणार आणि बोलणार असतील तर मुलगा तरी काय वेगळं बोलणार किंवा विचार करणार ना? 

अश्या गोष्टी सांगणारी आज्जी पाहिजे आणि इतकं लक्ष देऊन ऐकणारी मुलं पण. 

         का बरं मुलाला विमानात बसल्यावर, "हनुमान असेच समुद्रावरून उडून लंकेत गेले असतील का?" हा विचार आला नाही? किंवा, "रावणाकडे विमान होतं म्हणतात ते खरोखर कसं उडत असेल?" "श्रीराम लिहिल्यावर दगड पाण्यात तरंगले आपण पण एका दगडावर श्रीराम लिहून समुद्राच्या पाण्यात सोडून बघुयात का?" का बरं असे छोटे छोटे विचार मनात आले नाहीत? किंवा अजून काही का नाही आलं मनात? 

        कदाचित हे कधी वाचलं किंवा ऐकलं नसेल म्हणून. आणि जरी वाचलं किंवा ऐकलं असेल तरी ह्याच सगळ्या बद्दल चर्चा करणारे गप्पा मारणारे मित्र मिळाले नसतील. चला दुसर्यांना दोष नको. दुसऱ्याकडे बोट दाखवतांना स्वतःकडे असलेले तीन बोट बघूया. कदाचित आपण आपल्या पुराणातल्या गोष्टी जितके छान सुपरहिरो वाटतात तितक्या छान पद्धतीने सांगणं विसरलो आहोत म्हणून. 

हो हे थोडसं अती आहे, पण ही फाईट पहिल्या वर मला वाटलं होतं

 आपण कां नाही धनुष्य बाण चालवायला शिकलो!

           मी जे शेवटी सांगितलं ना त्याची शक्यता जास्त आहे. म्हणून मुलांना चित्रपट, न्यूज, सोशल मीडिया सगळं दाखवा पण तिथे जास्त लक्ष देऊ नको. थोडी मज्जा आली हसला ना की विसरून जा हे परत परत सांगावं. आणि आपल्या पुराणातल्या गोष्टी लक्षात ठेव. किती छान आहेत. किती मोठा विचार करून लिहिल्या आहेत हे परत परत सांगत चला. 

            मी माझ्या भाच्चा आणि भाच्चीला मुव्ही दाखवून घरी आलो आणि माझ्या कडे छोटीशी अगदी खिशात बसेल अशी गीता प्रेसची हनुमान चालीसा आहे. ती हनुमान चालीसा देत त्यांना विचारलं, "ही हनुमान चालीसा कोण कोण पाठ करून आता हनु-मॅन बनणार आहे?" दोघांनी उद्या मारून माझ्या कडून हनुमान चालीसा घेतली ते रोज ती म्हणतात आणि ती छान देवघरात ठेवली आहे. 

            आता सांगा इतक्या पटकन त्यांनी माझं कश्या मुळे ऐकलं असेल? इंफ्लुएन्स, ह्या चित्रपटाचा प्रभाव. अजून काय? कोणामध्ये बदल घडवून आणायचा असेल ना त्या शक्तीला इंफ्लुएन्स म्हणतात. आणि हाच इंफ्लुएन्स हे असे चित्रपट निर्माण करतात. तर भारतीय संस्कृती लहान मुलांना आवडेल, समजेल, पटेल अश्या पद्धतीने कोणीही समजावून सांगत असेल ना तर त्या व्यक्तीला, गोष्टीला, मुव्हीला, नाटकाला भरभरून प्रतिसाद द्या. नाहीतर आमचे सुपरहिरो चांगले तुमचे ग्रंथ, वगरे सगळ्या फक्त गोष्टी आहेत बाकी काही नाही हे पटवून देण्याचा प्रयत्न तर खूप वर्षांपासून चालूच आहे.

            म्हणून मला वाटलं की ह्या विषयावर लिहावं. ओळखीच्या सगळ्यांना पाठवावं. तुम्हाला पण असंच वाटतं असेल तर नक्की हा ब्लॉग ज्यांच्या घरात लहान मुलं आहेत त्यांना नक्की पाठवा.

हे घ्या माझ्याकडून एक फ्री गिफ्ट!

    आता प्रत्येक ब्लॉग मध्ये मी एक फ्री गिफ्ट देत असतो. तर ह्या ब्लॉग मध्ये एक यूट्यूब चॅनेल सांगतो जे माझ्या खूप कामात आलं आपले ग्रंथ, पुराण, कथा, भागवत, संस्कृती समजून घेण्यासाठी. कीर्तन विश्व हे नाव यूट्यूब वर सर्च करा आणि त्या वरचे आफळे बुवांचे कीर्तन आवर्जून ऐका. 

    माझा मनात कीर्तन ह्या विषयाचा अर्थ काहीसा वेगळाच होता. मी समजत होतो कीर्तन म्हणजे फक्त देवाचं नाव घेणे आणि हे पण सगळे असे लोकं करतात जे आता आपल्या कामातून निवृत्त झालेले आहेत. पण अगदी १-२ कीर्तनामध्येच माझ्या लक्षात आलं की मानवी जीवनाला वळणं लावण्याचं विलक्षण सामर्थ्य कीर्तन कलेमध्ये आहे. आणि हे निवृत्त होणारच नाहीत तर प्रत्येकाने ऐकावं. तरुणांनी तर आधी ऐकावं हे मला जाणवलं. 

        तर आजच फ्री गिफ्ट हेच आहे. तुम्ही नाही का नेटफ्लिक्स वर वेब सिरीज बिंज वाॅच करतात. एकाच रात्रीतून सगळे एपिसोड्स बघतात. तर आज श्रीरामांची कथा बिंज वाॅच करून बघणार का? अरे काय नाही ह्या कथेमध्ये!! आणि एकदा आफळे बुवांना ऐकाच. कसलं व्हीएफक्स आणि कसलं काय! तबला, पेटी पुरेसं आहे आणि कसलं चित्र उभं करतात डोळ्या समोर...वा रे वा...हे कीर्तन ऐकणाराच सांगू शकतो. अयोध्याधीश नावाची १२ एपिसोड्सची कथा आहे ती आवर्जून ऐका. 

            तुम्हाला जर असे लेख वाचायला मिळावे आणि मला ह्याची आठवण राहावी असं वाटतं असेल तर तुम्ही आमच्या ई-मेलच्या ग्रुपचा भाग बनू शकतात. आणि जर तुम्ही ई-मेल चेक कारण्यापैकी नाही तर आमची व्हॅट्सऍप कॉम्युनिटी जॉईन करू शकतात. इथे तुम्हाला नवीन लेख आला की नोटिफिकेशन मिळतं रहातील.

ई-मेल लिस्ट मध्ये सहभागी होण्या साठी इथे क्लिक करा. ई-मेल द्वारे पत्र व्यवहार.

टेलिग्राम चॅनल जॉईन करण्यासाठी इथे क्लिक करा. माझाव्यापार टेलिग्राम चॅनल.

व्हॅट्सऍप चॅनल जॉईन करण्यासाठी इथे क्लिक करा. माझाव्यापार व्हाट्सऍप चॅनल.

मी लिहिलेल्या छोटे लेख तुम्हाला आवडले असतील तर नक्की तुमच्या जवळच्या व्यक्तींना पाठवा. हा लेख जर आवडला नसेल तर मला कळवा आणि छोट्या छोट्या लेखातून प्रत्येक मनात जाण्याच्या आमच्या प्रयत्नाला बळ द्या.

बऱ्याच वर्षांनी मराठी लिहितो आहे. लिहिण्यामध्ये जर कुठे गडबड जाणवली तर भावनेकडे लक्ष द्या इतकीच विनंती. 

कळावे लोभ असावा,

तुमचा मित्र, 

अजिंक्य 🙏🏼 🙏🏼 🙏🏼