गणपती बाप्पांचं वेगळं रूप!

।। श्री ।।

सप्रेम नमस्कार विनंती विशेष,

        पुन्हा एकदा रविवार आणि पुन्हा एकदा आपल्या गप्पा. मी आज असं समजून बोलतो की तुम्ही क्रांतीज्योती विद्यालय  मराठी माध्यम हा चित्रपट पहिला असेल. नसेल पाहिला तर अजूनही असेल थिएटरला तर बघून या. 

        नेहमीप्रमाणे सगळ्यां वाचकांना खास धन्यवाद. या वेळेस तर तुमच्या, मी वाजवलेल्या पेटीबद्दल इतक्या प्रतिक्रिया आल्या की या पत्रात  पण मी शेवटी एक गाणं वाजवलं आहे पेटीवर. पोस्टमन बनून माझे पत्र भरपूर लोकांपर्यंत पोहोचवल्याबद्ल खास आभार.

        मी पेटी वाजवायला कधी शिकलेलो नाही. मग तुम्ही म्हणालं की कशी काय तू पेटीवर गाणे वाजवतो? तेच बोलूया आजच्या पत्रात. लेट्स गो!

अवघड फक्त भरपूर प्रॅस्टिसच्या आधी असतं! नंतर?

मी एक सांगू का? —मला पेटी वाजवता येत नाही.

१२ वर्षांपूर्वी मी थोडा काळ गाण्याच्या क्लासला जायचो. तेव्हा पेटी पाहिली होती. सा, रे, ग, म काय असतं हे कळलं होतं. पण त्यानंतर ना प्रॅक्टिस, ना सराव. मला एकच गोष्ट माहिती आहे. सगळी गाणी सात स्वरात असतात.

        मागच्या पत्रात मला "क्रांतीज्योती विद्यालय" या चित्रपटाबद्दल बोलायचं होतं.  फक्त “हा चित्रपट चांगला आहे” असं लिहिण्यापेक्षा पेटीवर गाणं वाजवून व्हिडिओ टाकला, तर कदाचित अजून लोकांना चित्रपट बघायची इच्छा होईल. असा विचार मी केला, म्हणून दोन दिवस प्रॅक्टिस केली, पेटीवर गाणं वाजवायला शिकलो आणि व्हिडिओ बनवला.

        तुमच्या सगळ्यांचे रिप्लाय वाचून माझ्या लक्षात आलं की तुम्हाला मी बऱ्याच वर्षांपासून पेटी वाजवत आहे असा गैरसमज झाला आहे. माझा पेटीचा सराव नाही पण एखादी गोष्ट करायची ठरवली, तर—

• शांतपणे ऐकणे 
• अनेक वेळा बघणे 
• शंभर वेळा ऐकणे
• शंभर वेळा प्रॅक्टिस करणे

आणि जमेपर्यंत प्रयत्न करणे. हा सराव मला नक्कीच आहे. 

पेटी नाही शिकलो पण, प्रयत्न करणं शिकलो!

        मी गणपती बाप्पाला परत परत नमस्कार करतो आणि तुम्हीही करावा म्हणून सांगतो आहे. का करावा परत परत नमस्कार?  कारण मला एक गोष्ट खूप आधीच समजली ती म्हणजे —प्रसन्न राहून प्रयत्न केला की गोष्टी जमतात.

आपल्याला गणपती बाप्पा म्हटलं की काय आठवतं?
मोठे कान, सोंड, पोट, लहान डोळे… बघितलं की प्रसन्न वाटणारी मूर्ती.

पण मला गणपती बाप्पा म्हटलं की काय आठवतं माहिती आहे? “समजणे.” "Understanding" 

        आपण म्हणतो ना, गणपती ही बुद्धीची देवता आहे. मला असं वाटतं की गणपती म्हणजे समजण्याची शक्ती. मूर्ती थोडी बाजूला ठेवूया—आज गणपती बाप्पांचं वेगळा रूप ते म्हणजे "समजणं" समजणे म्हणजे गणपती बाप्पा.

    एकच वाक्य वेगवेगळ्या व्यक्तींनी ऐकलं तरी प्रत्येक जण वेगळा अर्थ घेतो. ह्यालाच गणपती बाप्पा म्हणतात.  एक वाक्य "जसं आहे तसं" समजणं, "चुकीचं समजणं" आणि "भलतंच काही तरी समजणं", म्हणजेच गणपती बाप्पा. त्याची इच्छा असल्या शिवाय आपल्याला काहीही समजत नाही. त्यामुळे रोज काहीही करा पण गणपती बाप्पाना नमस्कार केलाच पाहिजे या मताचा मी आहे. 

    कल्लौ चंडीविनायेकौ। हा समर्थांचा दासबोधामधला शब्द आहे. सध्याच्या भाषेत सांगितलं तर कलियुगात देवी (चंडी) व गणेशाची उपासना करावी, असे शास्त्र सांगते.

यत्न तो देव जाणावा.

        समर्थांनी ज्या प्रकारे कलियुगात गणेशाची उपासना करा सांगितलं त्याच प्रमाणे ते यत्न तो देव जाणावा हे पण म्हणतात. प्रयत्न म्हणजेच देव आहे असं त्यांचं म्हणणं आहे.

        प्रयत्न सगळेच करतात पण बऱ्याच जणांना मी कुठे गडबड करताना पाहिलं आहे माहिती का? ते प्रयत्न वैतागून करतात. करा की एन्जॉय. आता गणपती बाप्पा ची इच्छा असेल तर तुम्हाला समजेल प्रयत्न म्हणजेच देव. मी म्हणालो ना वाक्य सोप्प आहे पण अर्थ प्रत्येकाला समजेलच असं नाही. 

        पण ज्यांना समजलं आहे त्यांच्या साठी बोलतो. आता समजलं ना प्रयत्न म्हणजे देव मग झालं देवासमोर किंवा देवासोबत काम करताना कटकट करणार का? ठरलं आहे ना प्रयत्न करायचे झालं मग. मी प्रसन्न राहून प्रयत्न करण्यात माझी झीज झाली तरी चालेल पण मी प्रयत्न करेन हे लक्षात राहू द्या. 

          जसा मी मागच्या आठवड्यात पेटी वर एक गाणं वाजवण्याचा प्रयत्न मी केला तसाच प्रयत्न मी परत एकदा प्रसन्न राहून गणपती बाप्पांचं गाणं पेटी वर वाजवलं. हे पण ऐका आणि गणपती बाप्पांची थोडीशी वेगळी ओळख कशी वाटली ते मला नक्की सांगा. हे गाणं मी माझ्या मनात मी घडवलेल्या "समजणे" या गणपती बाप्पांसाठी वाजवलं आहे. भेटूया पुढच्या पत्रात.

        हे मी पेटी वर वाजवलेलं गाणं ऐकून गणपती बाप्पा तुम्हाला नक्कीच एखाद्या गोष्टीच्या "समजणे" या रूपात भेटतील आणि तुम्हीही प्रसन्न राहून भरपूर प्रयत्न करून आपले ध्येय नक्की मिळवणार ही मला खात्री आहे. 

तो पर्यन्त स्वस्थ रहा, मस्त रहा आणि प्रसन्न राहून प्रयत्न करण्यात व्यस्त रहा. धन्यवाद. 

पुढच्या रविवारी?

पुढच्या रविवारी सकाळी ९ वाजता भेटूया. 

जर तुम्हाला आमचं पत्र नियमित मिळावं असं वाटत असेल, तर—

👉 WhatsApp ग्रुप Join करा
👉 Email Newsletter Join करा

धन्यवाद 🙏